কবিতাঃ আন্না শ্বিৰৰ কবিতা


আন্না শ্বিৰৰ কবিতা

ইংৰাজী: চেস্বোৱাফ মিলোজ
              লিঅ'নাৰ্ড নাথান
অসমীয়া ভাষান্তৰ: দ্বিজেন কুমাৰ দাস

এক:


যিদৰে গছৰ আছে বতাহৰ প্ৰতি 
সাগৰৰ প্ৰতি শঙ্খৰ
যিদৰে জীৱনৰ আছে যন্ত্ৰণাৰ প্ৰতি
মৃত্যুৰ প্ৰতি সময়ৰ
-- দুৰ্নিবাৰ ভালপোৱা

তেনে ভালপোৱাৰেই মই পূৰ্ণ এতিয়া৷

দুই: 


সেউজীয়াৰ মাজতে
আমাৰ ভালপোৱাৰ বাহ সাজিছা

মোহাৰি পেলোৱা ফুলবোৰলৈ
মন জানো কৰিছা?

তিনি:


মই সাঁতুৰিলোঁ মোৰ পৰা

নামাতিবা
তাতকৈ আহা সাঁতুৰি
তোমাৰ পৰা

আহা
দুয়ো একেলগে সাঁতোৰোঁ-- শৰীৰ এৰি
দুয়োৰে পৰা

আমাৰ শৰীৰ দুটা 
হৈ ৰওঁক এযোৰ চেণ্ডেল
সাগৰ পাৰত পৰি থকা!

চাৰি:


মোৰ লগত দুটা আলু
তাকে দেখি আগবাঢ়ি আহিল
এজনী তিৰোতা

কিনিব বিচাৰিলে মোৰ পৰা
ঘৰত তেওঁৰ ছোৱালী- ল'ৰা

লুকাই থ'লো আলু দুটা
নিদিলো তেওঁক

ঘৰত মোৰ মা! 




কবি পৰিচয় :
পোলেণ্ডৰ কবি আন্না শ্বিৰৰ প্ৰকৃত নাম আন্না শ্বিৰছজাইনস্কা৷ ১৯০৯ চনত প'লেণ্ডৰ ৱাৰশ্ব'ত জন্ম, মৃত্যু ১৯৮৪ চনত৷ পলমকৈ গুৰুত্ব লাভ কৰা এইগৰাকী কবিৰ কবিতাত দ্বিতীয় বিশ্বযুদ্ধ, মাতৃভূমি, নাৰীমন, আদি বিষয়ক ঘাই উপজীৱ্যৰূপে দেখা পোৱা যায়৷

উল্লেখযোগ্য গ্ৰন্থ: 
বিল্ডিং দ্য বেৰিকেড, টকিং টু মাই বডি, হেপী এজ ডগছ টেইল ইত্যাদি


Post a Comment

0 Comments