সদ্যপ্ৰয়াত প্ৰাক্তন ৰাষ্ট্ৰপতি, ভাৰতৰত্ন প্ৰণৱ মূখাৰ্জীৰ ৰাষ্ট্ৰপতিৰ বিদায়ী ভাষণ

অনুবাদঃ নিকু দুৱৰা

ৰাজনীতি বিজ্ঞান বিভাগ, নৰ্থ লখিমপুৰ কলেজ চৌহদ

Courtesy: NDTV Convergence Limited 2020


 

(মহান ৰাজনীতিবিদ তথা প্ৰাক্তন ৰাষ্ট্ৰপতি, ভাৰতৰত্ন প্ৰণৱ মূখাৰ্জীদেৱে যোৱা ৩১ আগষ্ট, ২০২০ তাৰিখে তেওঁৰ ৮৫ বছৰীয়া বণ্যাৰ্ঢ জীৱনৰ সামৰণি মাৰে। ভাৰতৰ ত্ৰয়োদশ ৰাষ্ট্ৰপতি হিচাপে কাৰ্যনিৰ্বাহ কৰা এইজন মহান স্বপ্নদ্ৰস্তা নেতাজনক হেৰুৱাই আমি TranslatorsAssam পৰিয়াল অত্যন্ত দুখী।

এই ভাষণটো ২০১৭ চনৰ ২৪ জুলাই তাৰিখে সংসদৰ মজিয়াত তেওঁৰ বিদায়ী ভাষণ হিচাপে প্ৰদান কৰিছিল। এই ভাষণটোত প্ৰাক্তন ৰাষ্ট্ৰপতিজনৰ বৰ্ণাঢ্য ৰাজনৈতিক জীৱনৰ বিষয়ে এক আভাষ পোৱাৰ লগতে ভাৰত গণৰাজ্যৰ বহুখিনি মূল্যৱান কথাও সন্নিৱিষ্ট আছে।)

 


১. সন্মানীয় সদস্যসকল, মই প্ৰথমতেই ৰাজ্যসভাৰ সন্মানীয় অধ্যক্ষ আৰু সদনৰ প্ৰত্যেকজন সাংসদৰ প্ৰতি মোৰ ধন্যবাদ আৰু প্ৰশংসা ব্যক্ত কৰিছো মই ত্ৰয়োদশ ৰাষ্ট্ৰপতি হিচাপে কাৰ্যকাল সামৰাৰ এই সময়কণত বিদায়ী অনুষ্ঠানটো আয়োজন কৰাৰ বাবে।

২. সন্মানীয় সদস্যসকল, মই মোক এই পৱিত্ৰ সদনৰেই সৃষ্টি বুলি গণ্য কৰোঁ, কিয়নো এই পৱিত্ৰ সদনেই মোৰ ৰাজনৈতিক দৃষ্টিকোণ গঢ় দি মোৰ ব্যক্তিত্ব গঠন কৰিলে। মোক ক্ষমা কৰিব যদিহে মই আজি নষ্টালজিক হৈ পৰো আৰু অতীতৰ কথাবোৰৰ মাজলৈ গুচি যাওঁ। ১৯৫০ চনৰ ২৬ জানুৱাৰী তাৰিখে ভাৰতবৰ্ষৰ সংবিধান লাগু হৈছিল। আদৰ্শবাদ আৰু সাহসহ উত্তম প্ৰকাশ কৰি আমি, ভাৰতৰ জনগণে আমাক ভাৰতীয় সাৰ্বভৌম গণতান্ত্ৰিক গণৰাজ্যৰ হাতত নিজকে অৰ্পণ কৰিছিলো আমাৰ সকলো নাগৰিকৰে ন্যায়, সমতা আৰু স্বাধীনতা ৰক্ষা কৰিবলৈ। আমি সকলোৱে সকলো নাগৰিকৰে মাজত ভাতৃত্ববোধ, সকলো ব্যক্তিৰে মৰ্যাদা আৰু দেশৰ একতা ৰক্ষা কৰিবলৈ দায়বদ্ধ হৈছিলোঁ। এই প্ৰমূল্যসমূহ আজিৰ আধুনিক ভাৰত ৰাষ্ট্ৰৰ বাবেও পথ-প্ৰদৰ্শক ধ্ৰুৱতৰা হৈ আছে। ৩৯৫ টা অনুচ্ছেদ আৰু ১২ টা অনুসূচীৰে প্ৰস্তুত কৰা এই সংবিধানখন কেৱল মাত্ৰ প্ৰশাসনৰ আইনী নথিয়েই হৈ থকা নাই, বৰং ভাৰতবৰ্ষৰ সামাজিক-অৰ্থনৈতিক পট পৰিৱৰ্তনৰ মেগ্না কাৰ্তাস্বৰূপ হৈ পৰিছে। ভাৰতৰ মহান সংবিধানে কোটি-কোটি ভাৰতীয়ৰ আশা আৰু প্ৰত্যাশাক প্ৰতিনিধিত্ব কৰে।

৩. আজিৰ পৰা ৬৮ বছৰৰ পূৰ্বে অৰ্থাত ভাৰতবৰ্ষৰ প্ৰথমটো নিৰ্বাচনৰ পাছৰ পৰাই ভাৰতীয় সংসদে সাৰ্বভৌম ভাৰতীয় নাগৰিকৰ আশাসমূহক প্ৰতিনিধিত্ব কৰি আহিছে। দুয়োখন সদনৰ প্ৰথমটো উমৈহতীয়া পৰিক্ৰমা উদ্ধোধন কৰিছিল ভাৰত গণৰাজ্যৰ প্ৰথমজন নিৰ্বাচিত ৰাষ্ট্ৰপতিয়ে আৰু তেতিয়াৰ পৰাই ভাৰতীয় সদন ব্যৱস্থাই তীব্ৰ গতিৰে উৰণ আৰম্ভ কৰিছিল।

সন্মানীয় সদস্যসকলঃ

৪. যেতিয়া মই প্ৰথমবাৰৰ বাবে এই পৱিত্ৰ সদনত ভৰি দিছিলো তেতিয়া মোৰ বয়স আছিল মাত্ৰ ৩৪ বছৰ। ১৯৬৯ চনৰ জুলাই মাহত মই পশ্চিমবংগৰ ছখন ৰাজ্যসভা আসনৰ এখনক প্ৰতিনিধিত্ব কৰি ৰাজ্যসভাৰ সাংসদ হিচাপে ইয়ালৈ আহিছিলোঁ। মোৰ ৰাজ্যসভাৰ নিৰ্বাচন অনুষ্ঠিত হৈছিল ৪ জুলাই তাৰিখে আৰু মই প্ৰথমখন অধিৱেশনত উপস্থিত হৈছিলো ২২ জুলাই, ১৯৬৯ চনত।

৫. সন্মানীয় সদস্যসকল, সেই তেতিয়াৰ পৰাই যোৱা ৩৭টা বছৰ মই ৰাজ্যসভা আৰু লোকসভাৰ সদস্য হিচাপে সেৱা আগবঢ়াই আহিলোঁ। মই পাঁচ বাৰৰ বাবে ৰাজ্যসভাৰ সদস্য হিচাপে কাৰ্যনিৰ্বাহ কৰিছিলো, যৰ চাৰি বাৰ পশ্চিমবংগৰ পৰা এবাৰ গুজৰাটৰ পৰা নিৰ্বাচিত হৈছিলোঁ আৰু দুবাৰকৈ লোকসভাৰ সদস্য হিচাপে কাৰ্যনিৰ্বাহ কৰিছিলোঁ। মোৰ এই সুদীৰ্ঘ ৰাজনৈতিক জীৱনটো যথেষ্ট শিক্ষাপ্ৰদ আছিল। মই যেতিয়া ৰাজ্যসভাৰ মজিয়াত ভৰি দিছিলো সেইসময়ত ৰাজ্যসভাৰ মজিয়া অভিজ্ঞ মুক্তি যুঁজাৰুসকলেৰে ভৰি আছিল, যাৰ ভিতৰত অনেকজন আছিল অত্যন্ত সুবক্তা। এম.চি চাগলা, অজিত প্ৰসাদ জৈন, জয়ৰামদাস দৌলতৰাম, ভূপেশ গুপ্তা, জয়েচিম আলবা, মহাবীৰ ত্যাগী, ৰাজ নাৰায়ণ, ভাই মহাবীৰ, লোকনাথ মিশ্ৰ, চিট্টা বসু আৰু বহু বণ্যাৰ্ঢ সদস্যৰ নাম লব পাৰি। সঁচা অৰ্থত ভূপেশ গুপ্তা ৰাজ্যসভাৰ এজন সঁচা অৰ্থত কিংবদন্তি সদস্য আছিল। ঠিক সেইদৰে চৰ্দাৰ বল্লভভাই পেটেলৰ পুত্ৰ আৰু কন্যা দয়াভাই পেটেল আৰু মানিবেন পেটেলে সেইসময়ত স্বতন্ত্ৰ পাৰ্টিক প্ৰতিনিধিত্ব কৰি ৰাজ্যসভালৈ আহিছিল। সংসদত মোৰ অতীত কালচোৱা বিভিন্ন মহান ব্যক্তিৰ সান্নিধ্যৰে অতিবাহিত হৈছিল। সেইসকলৰ ভিতৰত পি.ভি নৰসিংহ ৰাওৰ ধী-শক্তি, অটল বিহাৰী বাজপেয়ীৰ কথা-বাৰ্তা, মধু লিমায়েই আৰু ডঃ নাথ পাইৰ আচৰিত ধেমালিবোৰ, পিল মোডীৰ প্ৰতুৎপন্নমতিতাৰে পৰিপূৰ্ণ ৰসাত্মিকতাসমূহ, হীৰেন মূখাৰ্জীৰ কাব্যিক আলোচনাসমূহ, ইন্দ্ৰজি গুপ্তাৰ অত্যন্ত চোকা আৰু ব্যংগ প্ৰত্যুত্তৰসমূহ, ডঃ মনমোহন সিঙৰ ধৈৰ্যশীল উপস্থাপন, এল.কে আদৱানিৰ গম্ভীৰ উপদেশসমূহ আৰু চোনীয়া গান্ধীৰ সংসদৰ আলোচনাসমূহত নিৰৱিচ্ছিন্ন সহযোগিতাক মই কেতিয়াও পাহৰি যাব নোৱাৰোঁ।

৬. নিঃসন্দেহে এজন সাংসদ হিচাপে মোৰ জীৱনটোৰ অভিভাৱিকা আছিল শ্ৰীমতী ইন্দিৰা গান্ধী। তেওঁৰ লৌহসদৃশ দৃঢ়তা, চিন্তাৰ স্পষ্টতা আৰু সুস্পষ্ট সিদ্ধান্তসমূহে তেওঁক এগৰাকী সৌধসম ওখ ব্যক্তিত্বৰ নেত্ৰী হিচাপে প্ৰতিষ্ঠা কৰিছিল। তেওঁ অত্যন্ত স্পষ্টবাদী আছিল। মোৰ মনত পৰিছে জৰুৰীকালীন অৱস্থাৰ সমাপ্তিৰ পাছত ১৯৭৮ চনৰ নিৰ্বাচনত কংগ্ৰেছৰ পৰাজয়ৰ পাছত আমি লণ্ডনলৈ গৈছিলোঁ। বহুসংখ্যক সাংবাদিকে শ্ৰীমতী ইন্দিৰা গান্ধীক প্ৰশ্ন কৰিবলৈ অত্যন্ত আক্ৰমনাত্মকভাৱে অপেক্ষা কৰি আছিল। সাংবাদিকসকলে শ্ৰীমতী গান্ধীক সোধা প্ৰথম প্ৰশ্নটো আছিল  যে- আপুনি জৰুৰীকালীন সময়ৰ পৰা কি লাভ কৰিলে?” শ্ৰীমতী গান্ধীয়ে সাংবাদিকজনৰ চকুত চকু থৈ একেটা সুৰেৰেই উত্তৰ দিলে- সেই ২১টা মাহত আমি ভাৰতৰ সকলো স্তৰৰ মানুহকে আঁতৰাই পঠিয়াবলৈ ব্যাপকভাৱে সফল হলো। সকলোৱে এটা গিৰ্জনি পাৰি হাঁহি নীৰৱ হৈ গল । কোনো এজন সাংবাদিকেই আৰু প্ৰশ্ন কৰিবলৈ সাহস নকৰিলে। আৰু এই ঘটনাটোৰ পৰা মইও শিক্ষা পালো কিদৰে নিজৰ ভুলসমূহ স্বীকাৰ কৰি তাক সংশোধনৰ চেষ্টা কৰিব লাগে। তেনেধৰণৰ পৰিস্থিতিত নিজকে নিজেই শুদ্ধ বুলি প্ৰমাণ কৰাতকৈ আত্মশুদ্ধি বহুগুণে শ্ৰেষ্ঠ।

৭. সন্মানীয় সদস্যসকল, সেই সময়চোৱাত দুয়োখন সদনতেই সামাজিক আৰু অৰ্থনৈতিক বিষয়সমূহৰ বিষয়ত সাংঘাতিক স্পষ্ট আৰু দিগদৰ্শক বিতৰ্ক হৈছিল। মই ঘন্টাৰ পাছত ঘন্টা ধৰি চৰকাৰী বা বিৰোধীৰ আসনত বহি উক্ত বিতৰ্কসমূহ শুনি শুনি এই জীৱন্ত অনুষ্ঠানটোৰ সৈতে একাত্মতা অনুভৱ কৰিছিলোঁ। মই বিতৰ্ক, অমান্তি আৰু আলোচনাৰ প্ৰকৃত মূল্য উপলব্ধি কৰোঁ। মই অনুভৱ কৰো বিৰোধীসকলে জনসাধাৰণৰ প্ৰয়োজনীয়তাসমূহ উত্থাপন কৰোঁতে লাভ কৰা বাধাই তেওঁলোকক কিমান বিচ্ছিন্ন কৰি তোলে। মই প্ৰায়ে পণ্ডিত জৱহৰলাল নেহেৰুৱে কোৱা কথষাৰৰ গূঢ়ৰ্থ উপলব্ধি কৰোঁ (মই উক্তিটো তুলি ধৰিছোঁ)- পৰিৱৰ্তন আৰু ধাৰাবাহিকতাৰ মাজত সদায় এক ভাৰসাম্যতা ৰক্ষা কৰিব লাগে। সংসদীয় গণতন্ত্ৰৰ ব্যৱস্থাই সদায় এই পৰিৱৰ্তন আৰু ধাৰাবাহিকতাৰ নীতিক বহন কৰে। আৰু এই গোটেই কথাটো সেইসকলৰ ওপৰত নিৰ্ভৰ কৰে যিসকলে ব্যৱস্থাটো পৰিচালনা কৰে অৰ্থা দুয়োখন সদনৰ সদস্যসকল আৰু ব্যৱস্থাটোৰ সৈতে জড়িত বহুতো ব্যক্তি— তেওঁলোকেই পৰিৱৰ্তনৰ ধ্বজা বহন কৰিব লাগিব যাতে ই যিমান পাৰি সিমান সোনকালে হয় আৰু ধাৰাবাহিকৰূপে হৈ থাকে। যদিহে এই ধাৰাবাহিকতা ভংগ হৈ যায়, তেন্তে আমিবোৰ শিপাহীন হৈ পৰিম আৰু সমগ্ৰ সংসদীয় ব্যৱস্থাটো ভাগি পৰিব। মই সেইসমূহ সময় অতিবাহিত কৰি আহিছো যিসময়ত দুখীয়া আৰু কৃষকৰ  সুবিধাৰ্থে আইন আৰু আঁচনি প্ৰণয়ন কৰা হৈছিল। অতি সম্প্ৰতি অৰ্থা ১ জুলাই তাৰিখে গৃহিত হৈ যোৱা দ্ৰব্য আৰু সেৱা কৰ হৈছে সহযোগিতামূলক যুক্তৰাষ্ট্ৰৰ এক উজ্জ্বল উদাহৰণ আৰু ই ভাৰতীয় সংসদৰ পৰিপক্কতাক নিদৰ্শন কৰিছে। এই মহান তন্ত্ৰটোৰ সৈতে জড়িত হোৱাটো মোৰ বাবে এক অবিস্মৰণীয় অভিজ্ঞতা আৰু মোক এই সুবিধা প্ৰদান কৰাৰ বাবে মই ভাৰতৰ প্ৰতিজন জনসাধাৰণকে ধন্যবাদ জনাইছোঁ।

৮. এখন মহান ভাৰত হিচাপে নিজকে প্ৰতিষ্ঠা কৰাৰ সময়ৰ সাক্ষী আৰু অংশগ্ৰহণকাৰী হবলৈ পাই মই অত্যন্ত সৌভাগ্যশীল। ভাৰত এনে এখন মহান দেশ যৰ ১৩০ কোটি জনসাধাৰণ মূলতঃ তিনিটা নৃগোষ্ঠী ক্ৰমে আৰ্য, দ্ৰাবিড়ীয় আৰু মংগোলীয়ৰ অন্তৰ্ভুক্ত, যিসকলো মূলতঃ সাতটা মূল ধৰ্ম পালন কৰে আৰু ১২২টা ভাষা কয় সেই সকলো ভাৰতীয় এখন সংবিধান, এখন পতাকা আৰু এক প্ৰশাসনৰ আৱেষ্টনিত আছে।

৯. সন্মানীয় সদস্যসকল, এই ৩.৩ মিলিয়ন বৰ্গকিলোমিটাৰ দেশখনৰ প্ৰতিকন ভূ-ভাগ আৰু দ্বীপকে এই পৱিত্ৰ সংসদে প্ৰতিনিধিত্ব কৰিছে। লোকসভাৰ ৫৪৩ টা সমষ্টিৰ ৫৪৩ জন সাংসদে ভাৰতৰ জনগণক প্ৰতিনিধিত্ব কৰিছে আৰু ২৯ খন ৰাজ্য আৰু ৭খন কেন্দ্ৰীয় প্ৰদেশে নিৰ্বাচন কৰা ২৪৫ জন সাংসদে  একগোট হৈ আইন প্ৰস্তুত কৰিছে, কাৰ্যপালিকাৰ আদেশসমূহক পুনৰীক্ষণ কৰিছে আৰু জনগণৰ স্বাৰ্থক সুৰক্ষিত কৰিবলৈ ইবোৰক জনগণৰ প্ৰতি দায়বদ্ধ কৰি তুলিছে। এই ৭৮৮ টা কন্ঠৰ প্ৰতিটোৱেই অত্যন্ত গুৰুত্বপূৰ্ণ। এইটো দুখৰ কথা যে সদনৰ সংসদীয় সময় যথেষ্ট কমি গৈছে। প্ৰশাসনৰ বৰ্ধিত জটিলতাৰ সময়চোৱাত সংসদে পূৰ্বৱতী অভিজ্ঞতাক সাৰথি কৰি ইবোৰৰ নীৰিক্ষণ কৰিব লাগে আৰু পৰ্যাপ্ত আলোচনা কৰিব লাগে। পুনৰীক্ষণৰ বাবে গঠন কৰি দিয়া কমিটিসমূহ কেতিয়াও সংসদৰ মজিয়াত কৰা আলোচনাৰ বিকল্প হব নালাগে। যেতিয়া সংসদে ইয়াৰ আইন প্ৰণয়ন ভূমিকাৰ পৰা পিছুৱাই আহে বা কোনো আলোচনা নকৰাকৈ আইন প্ৰণয়ন কৰিবলৈ আগবাঢ়ে তেতিয়াই মই অনুভৱ কৰো যেন সংসদে এই মহান দেশখনৰ জনগণে ইয়াৰ ওপৰত প্ৰদান কৰা দায়বদ্ধতাৰ পৰা পিছুৱাই আহিছে।

১০. অধ্যাদেশ প্ৰণয়নৰ ক্ষেত্ৰত অধ্যাদেশ প্ৰস্তুত কৰিবলৈ সংসদ বন্ধ হৈ থকাৰ সময়চোৱাৰ তকালীন পৰিস্থিতিত কাৰ্যপালিকাক যথেষ্ট ক্ষমতা প্ৰদান কৰিছে। কিন্তু ছয় সপ্তাহৰ ভিতৰত সেই অধ্যাদেশসমূহক সংসদে তেওঁলোকৰ নিচেই পিচৰ অধিৱেশনত মঞ্জুৰী দিব লাগে।

১১. মই এই ধাৰণাত বিশ্বাসী যে অত্যন্ত প্ৰয়োজনীয় পৰিস্থিতিতহে অধ্যাদেশ মুকলি কৰিব লাগে আৰু বিত্তীয় ক্ষেত্ৰত অধ্যাদেশ মুকলি কৰিব নালাগে। সংসদত আলোচনা হবলগীয়া বা সংসদে ইতিমধ্যে আলোচনা কৰি থকা বা সংসদীয় কমিটিৰ হাতত থকা বিষয়ত অধ্যাদেশ মুকলি হব নালাগে। যদিহে বিষয়টো অত্যন্ত জৰুৰী হোৱাৰ সম্ভাৱনা থাকে তেন্তে বিষয়টোৰ সৈতে জড়িত কমিটিয়ে নিৰ্দিষ্ট সময়ৰ ভিতৰত অৱস্থাটোৰ বিষয়ে সজাগ কৰি তেওঁলোকৰ প্ৰতিবেদন দাখিল কৰিব লাগে।

সন্মানীয় সদস্যসকলঃ

১২. ২০১২ চনৰ ২২ জুলাই তাৰিখে মই ভাৰত গণৰাজ্যৰ ত্ৰয়োদশ ৰাষ্ট্ৰপতি হিচাপে নিৰ্বচিত হোৱাৰ লগে-লগে লোকসভাৰ পৰা মোৰ পদ খাৰিজ হৈছিল। যদিও সেইদিনা মোৰ ৩৭ বছৰীয়া সুদীৰ্ঘ সংসদীয় পৰিক্ৰমা সমাপ্ত হৈছিল তথাপিও তাৰ পাছতো ৰাষ্ট্ৰপতি হিচাপে ভাৰতীয় সংবিধানৰ নীতি অনুসৰি মই এই অনুষ্ঠানটোৰ সৈতে নিবিড়ভাৱে জড়িত হৈ আছিলোঁ। ভাৰতীয় সংবিধানৰ ৭৯ নং অনুচ্ছেদে কৈছেঃ সংঘৰ বাবে এখন সদন থাকিব যিখন ৰাষ্ট্ৰপতি আৰু দুইখন সভা ক্ৰমে লোকসভা আৰু ৰাজ্যসভাৰে গঠিত হব।”* যোৱা পাঁচবছৰীয়া কাৰ্যকালত মোৰ প্ৰধান দায়িত্ব আছিল সংবিধানৰ মূখ্য পালনকৰ্তা হিচাপে কাৰ্যনিৰ্বাহ কৰা। যিদৰে মই শপত গ্ৰহণ কৰোঁতে কৈছিলো- মই আমাৰ সংবিধানক সংৰক্ষণ, সুৰক্ষা আৰু নিৰাপত্তা প্ৰদান কৰাৰ শপত গ্ৰহণ কৰিছোঁ, কেৱল শব্দৰে নহয়, বৰং আত্মাৰ সৈতে। মোৰ এই দায়িত্ব পালন কৰাৰ প্ৰতিটো খোজতে প্ৰধানমন্ত্ৰী মোডীৰ উপদেশ আৰু পৰামৰ্শ লাভ কৰিছিলোঁ। দৃঢ় আৰু শক্তিশালীভাৱে তেওঁ দেশখনৰ গতিধাৰা সলনি কৰিবলৈ প্ৰচেষ্টা চলাই আছে। মই আমাৰ যুটীয়া কামবোৰ আৰু তেওঁৰ উষ্ণ অথচ বিনয়ী স্বভাৱৰ স্মৃতিক আজীৱন বহন কৰিম।

১৩. ভাৰত গণৰাজ্যৰ ৰাষ্ট্ৰপতি পদৰ পৰা অৱসৰ গ্ৰহণ কৰাৰ লগে-লগে সংসদৰ সৈতে মোৰ যুটীয়া সম্পৰ্কৰ ইমানতে ইতি পৰিল। এই পৱিত্ৰ সংসদৰ সৈতে মই আৰু কোনোপধ্যেই জড়িত হৈ নাথাকিম। এই কথাটো যথেষ্ট বিষাদপূৰ্ণ আৰু স্মৃতিৰ ৰামধেনুৰে পৰিপূৰ্ণ যে মই আজিৰ পৰা এই পৱিত্ৰ ভৱনটো ত্যাগ কৰিম।

১৪. মৰমৰ বন্ধুসকল, আপোনালোকক ধন্যবাদ জনাই আৰু হদয়ৰ নিভৃত কোণত প্ৰাৰ্থনা কৰি মই আপোনালোকৰ পৰা বিদায় লৈছোঁ। মই এই মহান দেশখনৰ জনগণক এই অনুষ্ঠানটোৰ জৰিয়তে এজন বিশ্বস্ত সেৱকৰ দৰে সেৱা কৰিবলৈ পাই যথেষ্ট আহ্লাদিত আৰু পৰিপূৰ্ণ অনুভৱ কৰিছো আৰু এই অনুভৱেৰেই বিদায় মাগিছোঁ।

ধন্যবাদ,

জয় হিন্দ!

 

* ভাৰতীয় সংবিধানৰ অনুচ্ছেদ-১ য়ে ভাৰতক এখন সংঘৰাজ্য হিচাপে ঘোষণা কৰিছিল। ইংৰাজীত Union আৰু অসমীয়াত সংঘ।

 

TranslatorsAssam is an Assamese web-based literary magazine to push upward the trend of translation literature of the Assamese literary field. Through this project we want to renovate the trend of translation literature, pioneered by the Madhav Kandlai, Sankardeva and Madhavdeva. We through this literary magazine want to promote new translators to the field of this art.   

Post a Comment

0 Comments